قازاقستان رەسپۋبليكاسى پرەزيدەنتىنىڭ جارلىعى № 993

قازاقستان رەسپۋبليكاسىنىڭ ءال-فارابي اتىنداعى عىلىم مەن تەحنيكا سالاسىنداعى جانە ادەبيەت پەن ونەر سالاسىنداعى مەملەكەتتىك سىيلىقتارى تۋرالى عىلىم مەن تەحنيكا, ادەبيەت پەن ونەر سالاسىنداعى جەتىستىكتەرى ءۇشىن مەملەكەتتىك سىيلىق بەرۋ جۇيەسىن جەتىلدىرۋ ماقساتىندا قاۋلى ەتەمىن: 1. قازاقستان رەسپۋبليكاسىنىڭ ءال-فارابي اتىنداعى عىلىم مەن تەحنيكا سالاسىنداعى مەملەكەتتىك سىيلىعى جانە قازاقستان رەسپۋب­ليكا­سى­­نىڭ ادەبيەت پەن ونەر سالاسىنداعى مەملەكەتتىك سىيلىعى تاعايىن­دالسىن. 2. مىنالار: 1) قازاقستان رەسپۋبليكاسىنىڭ ءال-فارابي اتىنداعى عىلىم مەن تەحنيكا سالاسىنداعى جانە ادەبيەت پەن ونەر سالاسىنداعى مەملەكەتتىك سىيلىقتارى تۋرالى ەرەجە; 2) قازاقستان رەسپۋبليكاسىنىڭ ءال-فارابي اتىنداعى عىلىم مەن تەحنيكا سالاسىنداعى مەملەكەتتىك سىيلىعىن بەرۋ جونىندەگى كوميسسيا تۋرالى ەرەجە; 3) قازاقستان رەسپۋبليكاسىنىڭ ادەبيەت پەن ونەر سالاسىنداعى مەملەكەتتىك سىيلىعىن بەرۋ جونىندەگى كوميسسيا تۋرالى ەرەجە; 4) قازاقستان رەسپۋبليكاسىنىڭ ءال-فارابي اتىنداعى عىلىم مەن تەحنيكا سالاسىنداعى مەملەكەتتىك سىيلىعىن بەرۋ جونىندەگى كوميسسيانىڭ قۇرامى; 5) قازاقستان رەسپۋبليكاسىنىڭ ادەبيەت پەن ونەر سالاسىنداعى مەملەكەتتىك سىيلىعىن بەرۋ جونىندەگى كوميسسيانىڭ قۇرامى; 6) قازاقستان رەسپۋبليكاسىنىڭ مەملەكەتتىك سىيلىعى لاۋرەاتىنىڭ ديپلومى مەن توسبەلگىسىنىڭ سيپاتتاماسى بەكىتىلسىن. 3. قازاقستان رەسپۋبليكاسىنىڭ ۇكىمەتى ءبىر اي مەرزىمدە وسى جارلىقتى ىسكە اسىرۋ جونىندە قاجەتتى شارالار قابىلداسىن. 4. وسى جارلىققا قوسىمشاعا سايكەس قازاقستان رەسپۋبليكاسى پرەزيدەنتىنىڭ كەيبىر جارلىقتارىنىڭ كۇشى جويىلدى دەپ تانىلسىن. 5. وسى جارلىقتىڭ ورىندالۋىن باقىلاۋ قازاقستان رەسپۋبليكاسى پرەزيدەنتىنىڭ اكىمشىلىگىنە جۇكتەلسىن. 6. وسى جارلىق 2015 جىلعى 1 قاڭتاردان باستاپ قولدانىسقا ەنگىزىلەدى جانە رەسمي جاريالانۋعا ءتيىس. قازاقستان رەسپۋبليكاسىنىڭ پرەزيدەنتى ن.نازارباەۆ. استانا, اقوردا 2015 جىلعى 21 قاڭتار. № 993

«قازاقستان رەسپۋبليكاسىنىڭ ءال-فارابي اتىنداعى عىلىم مەن تەحنيكا سالاسىنداعى جانە ادەبيەت پەن ونەر سالاسىنداعى مەملەكەتتىك سىيلىقتارى تۋرالى» قازاقستان رەسپۋبليكاسى پرەزيدەنتىنىڭ 2015 جىلعى 21 قاڭتارداعى № 993 جارلىعىنا تۇسىنىكتەمە

جارلىق قازاقستان رەسپۋبليكاسى پرەزيدەنتىنىڭ جانىنداعى شەتەلدىك ينۆەس­تورلار كەڭەسىنىڭ 2013 جىلعى 22 مامىردا وتكەن پلەنارلىق وتىرىسىندا ايتىلعان ءال-فارابي اتىنداعى جاڭا مەملەكەتتىك سىيلىقتى تاعايىنداۋ تۋرالى مەملەكەت باسشىسىنىڭ تاپسىرماسىنا سايكەس ازىرلەندى. ءال-فارابي اتىنداعى عىلىم مەن تەحنيكا سالاسىنداعى مەملەكەتتىك سىيلىقتى جانە ادەبيەت پەن ونەر سالاسىنداعى مەملەكەتتىك سىيلىقتى قازاقستان رەسپۋبليكاسىنىڭ پرەزيدەنتى تاۋەلسىزدىك كۇنىنە بەرەدى. ادەبيەت پەن ونەر سالاسىنداعى مەملەكەتتىك سىيلىق 2008 جىلدان باستاپ بەرىلەدى. ءال-فارابي اتىنداعى عىلىم مەن تەحنيكا سالاسىنداعى مەملەكەتتىك سىيلىق 2015 جىلدان باستاپ بەرىلەدى. ەكى جىلدا ءبىر رەت ءال-فارابي اتىنداعى عىلىم مەن تەحنيكا سالاسىنداعى جەتى مەملەكەتتىك سىيلىق جانە ادەبيەت پەن ونەر سالاسىنداعى ءۇش مەملەكەتتىك سىيلىق بەرىلەدى. ءال-فارابي اتىنداعى عىلىم مەن تەحنيكا سالاسىنداعى مەملەكەتتىك سىيلىق قازاقستان رەسپۋبليكاسىنىڭ ازاماتتارىنا: تەحنيكانىڭ, ماتەريالداردىڭ جانە تەحنولوگيالاردىڭ الەمدىك انالوگتار دەڭگەيىندەگى نەمەسە ودان جوعارى دەڭگەيدەگى جاڭا تۇرلەرىن ازىرلەگەنى جانە ءوندىرۋدى ۇيىمداستىرعانى ءۇشىن; ەكونوميكانىڭ ءتۇرلى سالالارىندا مەملەكەتتىك قۇپيالارعا جاتقىزىلعان مالىمەتتەردى قامتيتىن مۇلدەم جاڭا بۇيىمدار, تەحنولوگيالىق پروتسەستەر ازىرلەگەنى جانە جاساعانى ءۇشىن; مۇلدەم جاڭا ءونىم مەن تەحنولوگيالاردى جاساۋ جانە ولاردى ەكونوميكانىڭ ءارتۇرلى سالالارىنا ەنگىزۋ بويىنشا ەكونوميكالىق جانە (نەمەسە) الەۋمەتتىك اسەردى قامتاماسىز ەتەتىن عىلىمي-تەحنولوگيالىق قىزمەتتىڭ تانىلعان ناتيجەلەرى; باسىم الەۋمەتتىك-ەكونوميكالىق مىندەتتەردى شەشۋدى جانە ىشكى جانە سىرتقى نارىقتا قازاقستان رەسپۋبليكاسىنىڭ باسەكەگە قابىلەتتىلىگىنىڭ ءوسۋىن قامتاماسىز ەتەتىن تەحنولوگيالاردى وندىرىسكە ەنگىزۋ بويىنشا يننوۆاتسيالىق قىزمەتتىڭ ناقتىلى ناتيجەلەرى ءۇشىن بەرىلەدى. ادەبيەت پەن ونەر سالاسىنداعى مەملەكەتتىك سىيلىق قازاقستان رەسپۋبليكاسىنىڭ ازاماتتارىنا وتاندىق مادەنيەتتى دامىتۋعا قوسقان ەرەكشە باعالى ۇلەس دەپ تانىلعان, ادەبيەت پەن ونەر سالاسىنداعى اسا ۇزدىك شىعارمالارى ءۇشىن بەرىلەدى. ءال-فارابي اتىنداعى عىلىم مەن تەحنيكا سالاسىنداعى مەملەكەتتىك سىيلىق, ادەبيەت پەن ونەر سالاسىنداعى مەملەكەتتىك سىيلىقتى الۋعا ۇسىنىلعان جۇمىستاردى قازاقستان رەسپۋبليكاسىنىڭ ءال-فارابي اتىنداعى عىلىم مەن تەحنيكا سالاسىنداعى مەملەكەتتىك سىيلىعىن بەرۋ جونىندەگى كوميسسيا جانە قازاقستان رەسپۋبليكاسىنىڭ ادەبيەت پەن ونەر سالاسىنداعى مەملەكەتتىك سىيلىعىن بەرۋ جونىندەگى كوميسسيا قارايدى. كوميسسيالاردىڭ قۇرامى مەن ولار تۋرالى ەرەجەلەر قازاقستان رەسپۋبليكاسى پرەزيدەنتىنىڭ جارلىعىمەن بەكىتىلەدى. پرەزيدەنت اكىمشىلىگىنىڭ الەۋمەتتىك-ەكونوميكالىق مونيتورينگ ءبولىمى